MELYSION MELYSION MELYSION »

24.12.07

Atgasedd tuag at papur lapio

Mae gas gen i lapio anrhegion.

Dwi ddim yn un o bobol ‘ma sydd yn gallu neud anrheg edrych yn anhygoel.
Does gennai ddim digon o amynedd i dreulio oriau yn torri’r papur yn berffaith, rhoi'r selotep yn y lle iawn ag rhoi clymau del i orffen. Fel arfer fydd mwy o bapur selotep wedi cael ei gwastraffu nag beth dwi wedi defnyddio a fydda i wedi cael ‘paper cut’ erbyn i mi orffen.


Os fydd y teledu ymlaen fyddai’n gallu gwneud yr anrhegion i gyd mewn un rhaglen ond maen nhw’n edrych fel trychineb, neu fod rhyw blentyn 5 oed sydd wedi cael y swydd o lapio anrhegion y teulu.

Ond diolch byth…ma’r BBC yma i helpu pobol fel fi.

11.12.07

Nadolig ~ Nollaig

Mae Dulyn yn edrych yn Nadoligaidd iawn!

Dwi wedi bod yn canu carolau wrth gerdded drwy Grafton Street.

Mae dolig yn meddwl taith ar yr Stena HSS nol i Gymru. Dwi'n edrych 'mlaen i weld fy ffrindiau unwaith eto ag y teulu wrth gwrs. Dwi’n gobeithio bydd y tywydd yn ffeind a ddim yn chwythu gormod.

Ond fyddai’n methu Dulyn – dwi’n teimlo’n gartrefol iawn yma.



3.12.07

"Nothing Sticks To Teflon"

Ers i mi symyd i Dulyn dwi wedi bod yn darllen am anturiaethau y Taoiseach, Bertie Ahern.

Mae’r dyn wedi osgoi cael ei llychwino gan sgandalau di-ri:
o'r ‘rhoddion’ o €50,000 gan perchnogion amryw o fusnesau i benthygiad gan AIB gafwyd Bertie heb unrhyw gwarant.

Mae’r bwrdd iechyd (Health Service Executive) mewn trafferthion ag mae’r gwenidog iechyd Mary Harney dal yn ei swydd er fod bron i 100 o ferched wedi gorfod cael ei ail-profi am cancr wedi nhw cael yr ‘all clear’.

Byr amser fydd hi cyn i fwy o'r "dark deeds" o gorffenol Bertie yn dod i'r golwg, ond mae'n glir fydd y "Teflon Taoiseach" dal yn agos at calon Iwerddon.

1.12.07

Tair mis ar yr Ynys Werdd!

Mae bywyd yn Dulyn yn …difir!

Dwi wedi mynd nol i’r coleg i neud MA ac dwi wrth fy modd efo bod yn stiwdant eto. Mae fy nosbarth yn llawn o wahanol bobol, y rhan fwyaf yn dod o’r ynys werdd, ac mae pawb yn ffrindiau; hyd yn hyn!

Roeddwn i wedi cael swydd mewn tafarn pan wnes i symyd yma ond pan ges i ty ar ochor arall y dinas doedd hi ddim yn cyfleus i weithio yna. Ers hynny dwi’n ddi waith a wedi ceisio am oleiaf 30 o swydd heb ddim lwc. Ond dwi dal i fyw mewn obaith.

Mae fy Ngymreg i wedi dirywio yn y tair mis dwi wedi bod yma, ond dwi wedi darganfod y draig werdd – cymdeithas Cymraeg Iwerddon. Ella gaf i’r cyfle i ymarfer iaith y nefoedd, derbynnu os yw’r tafarn lleol yn gwenud cynnig arbennig ar cwrw i atynnu myfyrwyr fel fi.

9.10.07

Lle mae Melys?

Dwi wedi gadael mynyddoedd Cymru i byw yn Dulyn!!!

9.8.07

Siarc! Siarc! Siarc!

Roeddwn i wedi dechrau sgwennu blog am y Morgi mawr gŵyn yn Cernyw ag heb 'di cael cyfle i orffen o eto.

Yn y newyddion - Morgi mawr gŵyn wedi cael ei weld yn Gernyw. Diolch byth dydi hwn heb di bod yn brathu syrfyrs fel yr un yn gan Mr Huw (er yn meddwl am rhai o'r syrfyrs anfoesgar wnes i gyfarfod yn Ynys Môn fasa cael gwared ag un neu ddau ddim yn beth ddrwg.)Os oedd o'n wir na Morgi mawr gŵyn oedd y peth yn y llun ma’ siŵr oedd y peth bach 'di dychryn mwy na'r bobol ...

Ond heddiw dwi'n darllen na chelwydd oedd yr holl beth:

A man who claimed to have photographed a Great White Shark swimming dangerously close to the Cornwall coast has reportedly admitted he took the snap in South Africa.

Does gan bobol ddim byd gwell i neud na chreu storïau (neu flogio amdanyn nhw!)

1.8.07

Sarn + Sambuca = syniad drwg!

Wnes i neud y daith gyda ffrindiau i Pen Llyn pell i fwynhau bach o gerddoriaeth fyw - mewn noson allan post SF. Cerddoriaeth yn wych - Plant Duw, Derwyddon Dr. Gonzo ag Cowbois Rhos Botwnnog. Dwi heb ‘di cael noson allan yn Sarn ers sbel ac roedd hi’n braf gweld y lle yn llawn o bobol yn mwynhau.

Roedd y gemau yfed gyda Sambuca ddim yn syniad da ~ o leiaf ddim fi oedd yn dioddef fwyaf y diwrnod nesa (dwi’m yn enwi neb)!

24.7.07

Sesiwn Fawr Iawn

Dwi wedi blino ar y glaw ma. Am 4 o'r gloch ar brynhawn dydd Gwener roeddwn i wedi digalonni. Roedd y nefoedd wedi agor unwaith eto ac roedd drysau Sesiwn Fawr yn agor mewn awr a hanner. Roedd fy meddwl i'n llawn o ddelweddau o Sesiwn Fach iawn gyda minnau yn blaen y dorf yn ceisio creu awyrgylch o barti. Ond, fe ddaeth y bobol er gwaethaf y glaw. Ar y nos Wener daeth dros 1,500 o bobl i fwynhau’r perfformiadau syfrdanol. Erbyn dydd Sadwrn roedd y glaw wedi cilio a daeth 3,500 i fwynhau'r ŵyl.

Mae'n nyts i feddwl mai dim ond flwyddyn ynol roeddwn i wedi cael lliw haul yn y Sesiwn a threuliais y diwrnod yn eistedd tu allan. Y flwyddyn hon roedd y swyddfa docynnau, Tŷ Siamas a'r ystafell werdd yn cael gorchwyl rhag y glaw.

Dwi'n edrych ymlaen at Sesiwn Fawr 2008 yn barod!

15.7.07

Tesco ~ Dyw tipyn bach ddim digon da!

Ddoe, wnes i ymuno ymgyrch Cymdeithas yr Iaith yn Tesco Porthmadog.

Dydw i ddim yn ffan fawr o Tesco - mae gan y cwmni fonopoli yn Prydain ag yn tyfu bob diwrnod. Mae yna arwyddion Cymraeg yn Tesco Porthmadog, ond, mae'r arwyddion gyda'r cynigon arbennig, pamffledi'r siop, gwefan, labeli cynnyrch ddim ar gael yn ddwyieithog - ag yn wir dyw tipyn bach ddim digon da!


Mae rheolwyr Tesco Porthmadog i gyd yn Saesneg ac wedi symud i mewn i'r ardal tra mae pobol leol yn gweithio yn y swyddi sydd yn talu llawer llai. Mae 'na lawr o fewnfudwyr yn gweithio ar y tiliau ag ddim yn trio siarad Cymraeg - fel dwedes i mewn hen flog dwi dal i siarad efo nhw yn y Gymraeg (a la Ifor ap Glyn). Dwi yn credu fod Tesco wedi dod a swyddi i mewn i’r ardal, ond dwi hefyd yn credu fod o yn cael niwed ar siopau bach lleol ac felly yn affeithio ar swyddi pobol eraill.


Ella wneith y protest ddim owns o wahaniaeth, ond o leiaf mae yna dal bobol yn barod i sefyll i fyny am y pethau maent yn creu mewn.

10.7.07

Dawnsio yn y glaw..


Dwi ddim yn dallt pam dwi’n deffro bob bore ‘di blino! Fel arfer mae un yn rhoi pethau felly lawr i’r tywydd - ag pwy all beio fi. Does ddim synnwyr i gael - glaw, haul, glaw, haul…


Mae yna digon o gythrwfl yn fy mywyd ar hyn o bryd - symud tŷ, edrych ar ôl gath sydd yn mynd ar goll bob nos sydd yn meddwl fy mod i allan yn fy slipas am hanner nos yn chwilio amdani, a dwi wedi cymerid y penderfyniad i symud I Ddulyn ym mis Medi. Dwi wrth fy modd yn byw nôl yn Gogledd Cymru, ond er mwyn ehangu fy ngyrfa fel newyddiadurwr fydd rhaid i mi fynd yn nol i’r coleg - ac mae cyrsiau llawer rhatach yn fanno nag yn Prydain (yr £ i’r Euro).


Felly Ffarwel iti, Gymru Fad - ond mae’r haf dal i ddod! (ag Sesiwn Fawr wrth gwrs)

16.5.07

Blwyddyn yn Gymru...

Ia wir,
dwi wedi bod yn nol yn Gogledd Cymru am flwyddyn.

Yn yr amser yna dwi wedi…
Cael 4 swydd
Symud Tŷ
Gwneud ffrindiau newydd
Gweld hen ffrindiau
Helpu trefnu Sesiwn Fawr
Ysgrifennu erthyglau Cymraeg
Dechrau Blog Cymraeg : )
Bod i lefydd newydd

Wedi bod yn rhan Un Diwrnod Mewn Hanes
Ceisio neud popeth yn Gymraeg
Bod yn greadigol

Dringo mynydd
Cael car

Dawnsio gyda mynachod o Tibet
Cael digon o anturiaethau i sgwennu llyfr a hanner!

20.4.07

SESIWN FAWR DOLGELLAU 2007

Mae prif ŵyl cerddoriaeth byd Cymru, Sesiwn Fawr Dolgellau, wedi cyhoeddi ei rhestr o artisitiad am eleni, un o’r mwyaf cyffrous erioed gyda’r newyddion y bydd Steve Earle, The Dubliners, Damien Dempsey, Trans-Global Undreground, Davy Spillane a Paul Dooley, The Ukelele Orchestra of Great Britain ynghŷd â llu o artistiaid Cymreig a rhyngwaldol eraill oll yn diddannu’r miloedd ar 6 llwyfan yr ŵyl.

Artisitiaid rhyngwladol eraill a fydd yn ymddangos yw’r ddwy gantores canu gwlad Tia Mcgraff a Allison Moorer, a’r deuawd gwerin gwefreiddiol Shona Kippling a Damien O’Kane. Hefyd eleni bydd y chwedlonol Meic Stevens a’r actor a chanwr gwerin Ryland Teifi yn arwain rhestr o dalent Cymreig hen a newydd.

Mae artisitiad gŵyl eleni yn cynnwys rhai o enwau mwyaf y sin roc Cymraeg gan gynnwys Mattoidz, Radio Luxembourg, Cowbois Rhos Botwnnog a’r Genod Droog a fydd yn perfformio efo Sinfonia Cymru

Bydd un grwp arall o Gymru yn ymuno yn y parti wrth i wrandawyr BBC Radio Cymru bleidleisio am eu hoff artist i gloi’r Sesiwn Fawr nos Wener.


www.sesiwnfawr.com

11.4.07

Gweld y gwahaniaeth...


rhwng :

1.

















2.


















**Mae un cael ei yrru ar gyflymder ucha’ o 30 milltir yr awr yn ganol ffyrdd cul gan fod y perchennog heb di gyrru ar lonydd cefn gwlad - tra bod y llall yn cael ei defnyddio gan ffermwyr ar ledled y wlad, yn fwd i gyd ac wedi cael ei addasu i weithio gyda nifer o beiriannau eraill.




'Chelsea Tractor'? Cefn Gwlad?















Allwch chi ddyfalu pa sydd wedi bod yn fy ngwylltio wrth fynd i siopa dros ŵyl y banc?

3.4.07

Haul braf y gwanwyn.

Mae’r haul allan ac mae’n rhy braf i fod yn y swyddfa.

Mae’r tywydd wedi bod yn fendigedig dros y pythefnos diwethaf a dwi wedi bod yn cerdded ag yn garddio. Dwi ddim yn giamstar ar dyfu pethau, ond mae gen i un planhigyn dwi wedi gallu cynnal ers tair blynedd!


Roeddwn i ddigon ffodus i fynd i gig Griff Rhys yng Nghaergybi. Dwi heb di weld Griff heb y Furry’s o’r blaen felly doeddwn i ddim yn siŵr beth i ddisgwyl. Yn fyr - roedd hi’n noson wych ag yn werth y daith.

20.3.07

Fy nghalon drom...


Heb di sgwennu yn y blog ers sbel.

Dwi wedi cael pythefnos galed iawn...un o rhai mwy anodd fy mywyd.
Ar nos Sul, pythefnos yn nol, gefais y newyddion trist fod un o fy ffrindiau agos wedi marw mewn damwain yn Tsieina. Roeddwn hi heb di weld hi ers iddi fynd, ond roeddwn i’n e-bostio hi o bryd i bryd ac oeddwn i’n gweld ei lluniau diweddara ar Flickr.

Ers i mi cael y newyddion roeddwn i mor isel ....roedd fy nghalon yn drist. Wnes i gyfarfod y criw o ffrindiau roedd yn nabod Catherine ac roedd hynny’n cysur mawr. Dydd Iau diwethaf roedd y cynhebrwng yn ne Lloegr - diwrnod trist ag caled iawn iawn. Dwi ddim yn hollol iawn eto ond dwi ddim yn teimlo fel bod fy emosiynau ym mhobman fel o'r blaen.

Dwi’n meddwl fod 'na dal dagrau i ddod ond fel mae’r dywediad Saesneg yn dweud ‘life goes on’.

22.2.07

Newyddion Cymru...

Pam fod storïau ar dudalen Newyddion y BBC ag ar BBC News Wales yn wahanol?

Mae rhaid i mi ddarllen y ddwy i gael gwybod beth yw Newyddion Cymru.
Jest rhywbeth bach oeddwn i wedi sylwi ar wrth bori’r we.


Stori bach diddorol - pensiynwraig 81 oed yn cael ASBO.

20.2.07

Boeth ag yn flin.

Mae’r swyddfa fel ffwrnes heddiw!

Mae’i wedi bod yn wythnos gymysg hyd yn hyn. Dwi wedi neud llanast o’r tŷ wrth goginio bwyd neithiwr, Ges i 4 awr adra yn y pawn gan fy mod i’n gweithio gyda’r nos ag yn lle glanhau a neud pethe call wnes i wylio ‘The Shawshank Redemption’ a’r eitemau ar ran bonws y DVD. Dwi’n teimlo fel dwi angen cic fyny tin - sgennai ddim mynydd o gwbwl!

Dwi’n meddwl fod fy Nghymraeg ysgrifenedig yn gwella ers i mi symud nôl i Gymru. Wnes i sgwennu llythyr hir fel rhan o’m ngwaith ond dywedodd rhywun fod o’n llawn o allu iaith. Roedd dwy o bobol wedi sbïo ag cywiro’r llythyr cyn i mi yrru o allan - felly nid y fi yn unig sydd ar fai. Ond mae hi’n ergyd i’m hyder.

Beth bynnag,
mae na penwythnos o rygbi i edrych ymlaen i ag mae hi’n Dydd Mawrth Crempog – yumm!

19.2.07

Gwobrau RAP

Wel, penwythnos prysur arall yn fy myd i. Wnes i godi’ mhac draw i Landudno ar gyfer y gwobrau RAP …dyma fy marn i o'r noson:


Venue Cymru, Llandudno oedd y lleoliad, Gwobrau Roc a Phop Radio Cymru oedd y digwyddiad ac roeddwn wedi ymbincio yn barod ar gyfer un o nosweithiau mwyaf y flwyddyn yn y sîn roc Gymraeg.

Dyma'r tro cyntaf i mi fynd i'r noson wobrwyo yma a chyrhaeddais gyda meddwl agored gan fy mod wedi bod i hen ddigon o nosweithiau tebyg - rhai hir a diflas!

Roedd rhai o enwau mwyaf y sîn yn barod am noson fawr yn eu gwisgoedd gorau a chafodd llif o ddynion smart a merched tlws eu cyfarch gan y bownsars croesawus ar ddrws Venue Cymru.

Roedd y camerâu yn barod i gymryd lluniau o'r wynebau cyfarwydd cyn iddynt setlo yn eu seddau yn y neuadd fawr ble'r oedd y seremoni ar fin cychwyn.

Cyn i'r seremoni ddechrau roedd poteli gwin ar eu hanner ac roedd yr awyrgylch yn un hwylus dros ben. Yn wir, doedd dim math o ymddygiad roc a rôl i'w weld drwy gydol y nos.

Cyflwynwyr y noson oedd Lisa Gwilym a Dafydd Du a nhw wnaeth gyflwyno set gyntaf y noson sef Cowbois Rhos Botwnnog. Roedd caneuon bywiog ac egnïol y band o Ben Llŷn yn agoriad arbennig i'r noson ac roedd y gynulleidfa yn mwynhau eu cerddoriaeth 'hilbili'.

Un ar ôl y llall, cafodd enillwyr dlysau am eu gwaith caled dros y flwyddyn ddiwethaf. Ond noson i'r Gogs oedd hi gyda'r rhan fwyaf o'r artistiaid, bandiau a digwyddiad byw y flwyddyn yn dod o ogledd Cymru.

Roedd enillwyr y noson yn sicr yn haeddu'r clod a'r unig artist absennol oedd Mim Twm Llai, cyfansoddwr y flwyddyn - sydd ar hyn o bryd yr ochr draw i'r byd.

Roedd yna lu o berfformiadau byw gan rai fel artist benywaidd y flwyddyn, Swci Boscawen, a chafwyd perfformiad gan y Ffyrc a enillodd ddwy wobr yn ystod y noson.

Genod Droog, enillwyr dwy wobr gan gynnwys band byw'r flwyddyn a orffennodd y noson gyda cherddorfa yn gwmni iddynt ar y llwyfan. Roeddent yn glo hwyliog i'r noson gyda chriw yn dawnsio o flaen y llwyfan o'r dechrau.

Ond cyn i bawb ffoi am y parti roedd cyri ar gael i bawb a siawns i drafod y buddugol a'r anfuddugol cyn mynd ymlaen i ddathlu tan yr oriau man.

Gadewais gydag atgofion da o noson wobrwyo gyfeillgar - noson gall, noson barchus i bawb.


Ond mae'r parti'n stori wahanol....

23.1.07

Cysylltiadau Celtaidd

Mae’r mynyddoedd yn wyn a’r aer mor oer allwch chi flasu o. Dwi wrth fy modd efo boreau fel hyn. Roedd cot wen y mynyddoedd yn llachar, yn enwedig yr Wyddfa. Mae hi wedi bod yn aeaf twym i gymharu efo rhai blynyddoedd, ond mae’n edrych fel bod yr oerni wedi cyrraedd!

Yr wythnos yma dwi’n mynd i’r ŵyl
Cysylltiadau Celtaidd yn yr Alban. Dwi’n neud y daith traws-gwlad ar drên, a dwi’n pryderu am y siwrne - tybed os fydd eira yn rhwystro ein siwrne. Does gen i ddim llawer o ots am y ffordd adra ond dwi’n edrych blaen gymaint dydw i ddim eisiau methu dim!

Mae Cysylltiadau Celtaidd gyfle i weld bandiau o bob rhan o’r byd perfformio yn ‘Showcase Scotland’, y prif ddigwyddiad dros yr ŵyl. Wnâi adrodd nôl gyda rhai o fy anturiaethau yn yr Alban yn fuan iawn…

17.1.07

Pobi a Pop

(Torth debyg i'r un wnes i)

Wedi mi fynd adra o'r gwaith wnes i benderfynu gwneud 'soda bread'. Dwi heb neud un ers sbel a dwi'n anghofio pa mor hawdd ydi coginio un.
Roedd y gegin yn edrych fel hunlle ond es i allan am dro yn lle glanhau yn syth.
Ar ôl taith cerdded yn y gwynt a'r glaw roedd y bara yn barod. Ges i gawl cennin a bara ffres fel gwobr am neud yr ymdrech i gadw heini - bendigedig!

Mae'r amser noson gwobrwyo RAP Radio Cymru wedi cyrraedd unwaith eto. Roedd 2006 yn flwyddyn dda i gerddoriaeth Gymraeg felly fydd hi'n ddiddorol i weld pa fandiau wenith ennill. Fel rheol mae nosweithiau gwobrwyo yn bethau diflas dros ben ag yn ddim byd mwy nag pobol yn llongyfarch ei hunain ar faint mae'r diwydiant yn caru nhw ag cyfryngis jest a phiso'i thrôns i weld pobol yn bihafio yn roc a rôl! Ond ga'i weld os ydi rhai Cymraeg yn mynd yn erbyn y drefn!

8.1.07

Dechrau da i '07

Dwi yn fy ngwaith am y tro cyntaf yn 2007.
Roedd hi’n uffar o job cael fy hun allan o’r gwely bore ma’. Neithiwr wnes i osod fy larwm yn fuan achos ges i’r syniad yn fy mhen o godi’n fuan a gwneud llwyth o bethau cyn i mi adael yr ty…ond unwaith eto wnes i adael yn hwyr gyda fy ngwallt fel nyth fran a phethe’n disgyn o fy mag wrth i mi rhedeg i’r car.

Roeddwn i’n drist i glywed am farwolaeth James Brown ar ddiwrnod 'Dolig. Roedd o’n ganwr anhygoel a dwi’n difaru peidio mynd i weld o dra roeddwn i’n byw yn Llundain - ond felly mae bywyd!

4.1.07

Bulmers yn Kerry.

Dwi wedi bod yn y Werddon am wythnos yn mwynhau'r Bulmers a bach o’r Guinness. Roedd brêc bach o fywyd bob dydd yn fendigedig! Er fy mod i wrth fy modd efo’r Nadolig mae’r rhedeg o gwmpas yn paratoi yn waith blinedig!

Wnes i fynd i Killarney gyda ffrindiau o ogledd Cymru i ddathlu’r diwedd 2006 a dechrau’r flwyddyn newydd. Fyddai’n treulio bob blwyddyn newydd yn Iwerddon, bach o newid o’r tafarndai lleol ac mae’n cyfle gweld teulu ar y ffordd adref.

Wnes i dreulio wythnos yn ymlacio, cerdded, reidio ceffylau a mwynhau bywyd. Roedd hi’n lle hynod o groesawus ag yn llawn o bobol yn chwilio am hwyl a sbri i’r oriau man.


Wnes i neud trip o gwmpas y ‘Ring of Kerry’ ar ddiwrnod cynta’ flwyddyn, ag er i mi gael ychydig bach o gwsg y noson cynt wnes i fwynhau gweld y golygfeydd anhygoel a mynd i bentrefi bach a chyfarfod y bobol leol dros beint. Dwi heb ‘di bod i’r ardal ers i mi fod yn blentyn ond dwi wedi dod adref gyda thomen o atgofion melys i wneud i mi wenu yn y tywydd sâl ma’!


BLWYDDYN NEWYDD DDA!!